Ginpahayag nga paguwa sa PRO 6 headquarters sang 2 sa 3 ka pulis nga restricted ang status, paga-imbestigaran

By: Aine Grace Bravo | July 5, 2019, 6:30PM

Via Aksyon Aljohn Torreta

Kampo Delgado — Imbestigaran ni Police Lieutenant Colonel Mannan Muarip, head sang Regional Headquarters Support Unit, ang ginpahayag paguwa sa Police Regional Office 6 sang duha sa tatlo ka mga pulis nga gin-restrict matapos ginreklamo wala gilayon nagbayad sang bill sa club sa City Proper.

Suno kay Muarip, wala nakaguwa sa kampo ang natungdan nga mga pulis sugod sang gin-restrict sila sang June 28 bangud wala man nakalisensya sa iya.

Pero mahimo suno sa iya makaguwa sa kampo ang mga gin-restrict nga mga pulis sandig sa PNP Memorandum Circular No. 023 sang 2017, apang kinahanglan pa nga aprubahan ang ila request sang ila custodian ukon head sang ila unit.

Mapahamtang man siya sang logbook agud malista ang tanan nga aktibidad sang tatlo ilabi na kun maghingyo sila nga maguwa sa kampo.

Gin-restrict kanday Chief Master Sergeant Jose Dinggal, Senior Master Sergeant Fernil Mark Mallorca kag Staff Sergeant Ralph Mabuque matapos na-angut sa insidente sa Club 88 sang Hunyo 26 sang kaagahun.