Ginpahayag pagpuli sapote sa 2 nadakpan sa drug operation sa San Jose Police Station sa Antique, imbestigaran sang CHR 6, NAPOLCOM 6 kag PRO 6
By: JoMaque | July 5, 2019, 9:50am
Via Aljohn Torreta
Iloilo City — Magahimo sang motu propio investigation ang Commission on Human Rights 6, National Police Commission 6 kag Police Regional Office 6 paagi sa Regional International Affairs Service sa ginpahayag pagpuli sapote sa duha ka nadakpan sa buy bust operation sa Barangay San Angel, San Jose, Antique sang Hulyo 2.
Suno kay Edgardo Luis, supervising investigator sa CHR 6, nalakip na sa ila docketing system ang amo nga reklamo kag natalana magkadto sa San Jose ang ila imbestigador agud magtipon sang impormasyon.
Imbestigaran sang CHR kun may paglapas sa tawhanon nga kinamatarong sa pag-aresto sa mga natungdan.
Suno naman kay Inspector 4 Napoleon Arostique Jr, chief sang Technical Services Division sang NAPOLCOM 6, lakip man sa ila mandate nga mag-monitor kag mag-conduct sang imbestigasyon sa ginpahayag iregularidad sa police operation.
Indi naman ini makabig nga forum shopping suno kay Arostique bangud criminal case ang gina-imbestigaran sang CHR, samtang administrative case naman ang ginatutukan sang NAPOLCOM kag RIAS.
Mahimo naman separado nga magpasaka sang kaso ang nasambit nga mga ahensiya kag maghatagay sang impormasyon.
Gin-refer ni PRO 6 Spokesperson Lieutenant Colonel Joem Malong ang concern sa RIAS.
Dapat ma-imbestigaran ang reklamo suno kay Malong agud maathagan kun ano gid man ang nagluntad sa buy bust operation.
Matandaan, nagreklamo kanday Raymond Juala kag Ariel Velasco nga ginpulihan sila kastigo sang mga pulis rason naghanog ang nagkalain lain nga bahin sang ila lawas.
Ginpanginwala naman ni Juala nga ginapanag-iyahan niya ang pito ka sachets sang suspected shabu nga na-recover sa drug operation.