By: JoMaque | July 9, 2019, 8:15am
Via Aksyon Angel Mae Ciudad/Fline

Iloilo City – Apat sa 17 ka establisemento sa syudad nga gin-monitor ang nadakpan sang enforcement team sang Department of Trade and Industry (DTI) 6 nga nagabaligya sang uncertified/substandard nga steel bars.

Suno kay Judith Degala, chief sang Consumer Protection Division sang DTI 6, ginpadal-an sang notice of violation ang duha ka establisemento sa City Proper, isa sa Jaro kag isa sa Lapaz.

Wala ginlawag ni Degala kon ano nga mga hardware ang nagabaligya sang substandard nga mga kabilya bangud first offense pa man lang suno sa iya ang ila nahimo.

Na-identify nga substandard ang steel bars bangud wala sang marka sang logo sang manufacturer.

Magluwas sa Iloilo, nag-deploy man ang DTI sang teams sa iban pa nga probinsya sa Western Visayas.

Natukiban man nga nagabaligya sang substandard steel bars ang tatlo sa lima ka baligyaan nga gin-check sa Aklan; tatlo sa pito ka baligyaan sa Antique; lima sa anum ka gin-monitor sa Negros Occidental; duha sa tatlo ka establishments sa Guimaras kag isa sa tatlo ka hardware nga gin-monitor sa Capiz.

Ginhatagan sang 48 oras ang mga establisemento agud magsumiter sang paathag sa DTI kon ngaa indi sila pagpasakaan sang kaso.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply