Driver sang sports car nga nakabunggo-patay sa mag-asawa nga Osano, napaslawan sa pagsumiter sang iya sabat sa gin-issue nga show cause order sang LTO 6

By: JoMaque | July 9, 2019, 8:27am

Iloilo City — Napaslawan nga makasumiter sang iya sabat sa Land Transportation Office 6 ang driver sang sports car nga nakabunggo-patay sa mag-asawa nga Osano sa Diversion Road, Mandurriao sang nagligad nga bulan.

Nagtakup kahapon ang ikaduha nga deadline nga ginhatag sang LTO 6 kay June Paul Valencia, 32 anyos sang Mandurriao, agud magsabat sa show-cause order.

Hunyo 24 nagtakop una nga deadline kay Valencia, pero naghingyo siya sang dugang nga 15 ka adlaw kag ginrason ang ‘mental confusion.’

Ginconfirmar ni Mr. Jojo Jamerlan, deputy chief for operations sang LTO 6, nga wala nakasumiter sang sabat si Valencia subong nga adlaw

‘PLASO’

Ginhatagan ni Jamerlan si Valencia sang tatlo ka adlaw agud mabaton sang ila opisina ang iya sabat samtang gina-finalize sang Operations Division ang ila report sa insidente.

Posible suno kay Jamerlan nga ginpadala ni Valencia ang iya sabat paagi sa registered mail rason na-delay ang pag-abot sa LTO.

Kun indi naman magsabat si Valencia, makabig nga gina-waive niya ang kahigayunan nga mabatian sang LTO 6 ang iya bahin angut sa insidente.

Naga-epekto pa ang 90-day suspension sa driver’s license ni Valencia, pero posible palawigon ini ukon i-revoke, depende sa rekomendasyon sang Operations Division kag desisyon ni LTO 6 Director Roland Ramos.

Hunyo 15 sang nabungguan-patay sang sports car ni Valencia ang mag-asawa nga Joe Marie kag Alnie Dinah Osano.

Ginpasakaan sang pamilya sang mag-asawa sang kaso si Valencia kasunod sang natabu.