Petition for Permanent Injunction sang PECO batuk sa franchise sang MORE, gin-grant sang Mandaluyong RTC

By: Aine Grace Bravo | July 9, 2019, 5:30PM

Via Aksyon Hotline

Iloilo City — Ginkumpirmar ni Atty. Hector Teodosio, local counsel sang MORE Electric and Power Corporation (MORE Power), nga nakalab-ut na sa iya ang impormasyon nga gin-grant sang Regional Trial Court sa Mandaluyong ang petition for permanent injunction sang Panay Electric Company (PECO) batok sa power franchise sang MORE.

Sa desisyon sang RTC Branch 209 sa Mandaluyong City, gindeklarar man ang Sections 10 kag 17 sang Repuclic Act 11212, ang kasuguan nga naghatag sang prangkisa sa MORE, nga void kag unconstitutional.

Suno kay Teodosio, ginpaabot na nila ang ini nga posibilidad.

Ginakabig ni Teodosio nga indi seryoso nga problema ang desisyon sang Mandaluyong RTC bangud indi pa ini final kag subject pa sa apelasyon sa Court of Appeals (CA) ukon sa Supreme Court (SC).

Ang complaint para sa expropriation sang MORE yari naman suno sa iya sa Iloilo RTC.

Kun sundon suno kay Teodosio ang rules of court kag established jurisprudence, ang RTC sa Iloilo pareho ka-independent kag ka-gamhanan sa Mandaluyong RTC.

Magka-problema lang suno sa iya kun ang desisyon naghalin sa CA ukon sa SC ukon kun mag-issue sang injunction ang RTC sa Iloilo.

Wala ginadula ni Teodosio ang posibilidad nga magpa-iway ang Iloilo RTC kasunod sang desisyon sang Mandaluyong RTC.

Ginahulat pa ni Teodosio kun ano ang mangin masunod nga tikang sang major law firm nga amo ang naga-uyat sang kaso sang MORE sa Manila.

Dugang pa ni Teodosio, madamo kag kumplikado nga mga kaso ang nakapalibot sa away sang duha ka higante nga kompaniya nga pareho nagahandum nga mangin power distributor sa siyudad sang Iloilo.

Lakip dire suno sa iya ang ginpasaka nga kaso sang PECO sa CA nga naga-apelar nga untaton ang hearing sang Iloilo RTC pero wala gin-grant. May kaso man ang PECO sa SC nga nagapangayo nga sayluhon ang hearing sa expropriations complaint sa Manila sa pagpati nga hostile ang sitwasyon sa Iloilo kag may kaso man ang MORE sa Mandaluyong RTC.

Tubtob indi pa pinal ang desisyon, nagapati si Teodosio nga wala sila sang dapat kabalak-an.

Gindugang ni Teodosio nga wala naman sang epekto ang gag order nga ginpangayo sadto sang PECO sa korte bangud ila man ini ginbawi.

BACKGROUND

Pebrero 14, 2019, ginpirmahan ni Presidente Rodrigo Duterte ang RA 11212 nga nagahatag sang prangkisa sa MORE Power kag nagtapos sa 95-anyos nga power distribution license sang PECO.

Marso 6, nag-file sang temporary restraining order (TRO) ang PECO agud balabagan ang pag-take over sang MORE Power.

Ini ang labing una nga legal move sa tunga sang PECO kag MORE.

Ang petition for declaratory relief with TRO application gin-file sa Mandaluyong Regional Trial Court Branch 209 kag respondents ang MORE Power, Department of Energy, Energy Regulatory Commission kag “all other governmental agencies tasked to implement RA 11212.”

Partikular nga ginkwestyon sang PECO ang sections 10 kag 17 sang bag-o nga kasuguan nga nagapahanugot sa MORE nga i-expropriate ang assets sang PECO.

Ang Section 10 nagasiling: “The grantee may acquire such private property as is actually necessary for the realization of the purposes for which this franchise is granted, including but not limited to poles, wires, cables, transformers, switching equipment and stations, building, infrastructure, machineries and equipment previously, currently or actually used, or intended to be used.”

Ang Section 17, naman nagahambal: “The provisional authority to operate during the transition period shall not be construed as extending the franchise of PECO after its expiration on Jan. 18, 2019, and it shall not prevent the grantee from exercising the right of eminent domain over the distribution assets existing at the franchise area…”

Ginhatagan sang duha ka tuig ang PECO agud padayon nga mag-operate tubtob handa na ang MORE Power nga mag-take over.

COMPLAINT FOR EXPROPRIATION EXPLAINED

Marso 11, nag-file sang Complaint for Expropriation ang MORE sa Regional Trial Court.

Ang complaint for expropriation base sa paathag ni Atty. Eldrid Antiquera, remedyo sa idalum sang rules of court kag gina-file sa husgado agud maka-take over sang pribado nga propiedad pareho sang assets sang PECO.