Self-medication, wala gina-engganyo sang DOH sa mga dengue patients

By: Aine Grace Bravo | July 9, 2019, 5:30PM

Via Aksyon KhenJo Terco

Iloilo City — Ginpanugyan sang Department of Health ukon DOH sa publiko ang pagpili sang nagaka-angay nga bayo agud matabunan ang lawas kag indi dali-dali makutot sang lamok nga may dala nga dengue.

Suno kay Dr. Jessie Glen Alonsabe, regional epidemiologist sang DOH 6, mas maayo nga magsuksok sang mga bayo nga may malaba nga pako ukon pants ilabi na ang kabataan agud nga matabunan ang parte sang lawas nga mahimo makutot sang lamok.

Mas maayo man nga mag-apply sang mga mosquito repellent.

Mahimo nga butangan sang screen ang mga bintana ukon pwertahan sang balay ukon eskwelahan agud indi makasulod ang lamok.

Ginpanyugyan man ang pagamit sang moskitero sa balay ilabi na ang may mga lapsag.

Gin-athag man ni Dr. Alonsabe nga mas epektibo gihapon nga pamaagi agud indi magdamo ang lamok ang pagpaninlo sang palibot agud wala sang ma-itlogan ang mga lamok.

‘ORGANIC MOSQUITO REPELLENT’

Wala sang problema ang pag-gamit sang mga organic mosquito repellent suno kay Dr. Alonsabe, pero dapat siguraduhon nga wala sang allergy ang magamit sini.

Mas maayo pa gid kun aprobado sang Food and Drug Administration (FDA) ang mga ginagamit nga repellent.

‘SELF MEDICATION’

Wala naman gina-encourage sang DOH ang ‘self medication’ kun naga-suprer sang dengue ang pasyente.

Dapat nga madala gid sa ospital ang pasyente agud nga ma-check sang maayo suno kay Dr. Alonsabe.

Iya gin-athag nga indi kinahanglan i-admit ang tanan nga mag-positibo sa dengue magluwas lang kun may warning signs na kag nagakinahanglan sang maid-id nga pagbulong.