Hepe sang Miagao MPS, nagsabat sa kontrobersiyal nga pagpangayo sang impormasyon sa mga miembro sang ACAD-Union sa UP Visayas

By: JoMaque | July 11, 2019,

Miagao —  Nagpa-athag ang hepe sang Miagao Police Station matapos nangin kontrobersiyal ang pagpangayo niya sa Chancellor sang UP Visayas sang impormasyon sang mga miembro sang All UP Academic Employees Union – Iloilo Chapter.

Suno kay Police Major Johnny Tumambing, inisyatibo sang Miagao police ang paghingyo sang impormasyon para sa proteksyon kag madasig nila nga koordinasyon sa mga natungdan kun ma-angut sa insidente.

Magluwas sa mga faculty, staff kag researchers sang UP Visayas, luyag man ni Tumambing nga makakuha sang contact person sang mga student leaders sa UP Visayas.

Gin-ako naman ni Tumambing nga wala sang Memorandum Circular ukon Department Order sa Philippine National Police angut sini, apang nalakip sa ila Police-Community Relations ang pagdihon sang mga programa ilabi sa mga institusyon ukon sektor nga kabahin sang ila area of responsibility.

“CONTACT PERSON”

Wala sang contact person ang Miagao police sa UP Visayas suno kay Tumambing rason mangin mas madasig ang ila pagtransaksyon kun may gina-uyatan sila nga mga impormasyon.

Ginpanginwala NAMAN ni Police Regional Office 6 spokesperson Pol. Lt. Col. Joem Malong nga ginmanduan nila si Tumambing sa pagpangayo sang impormasyon sang mga empleyado sang UP Visayas.

‘UNNECESSARY’

Nanindugan naman si UPV Vice Chancellor for Administration Mary Ann Gumban nga indi na kinahanglan na magpangayo pa si Major Tumambing sang contact person sa unibersidad.

Imbes direkta nga makig-angut sa mga natungdan, dapat mag-contact anay si Tumambing sa Central Management Office sa diin kabahin si Vice Chancellor Gumban.

Ginhatagan man ni Vice Chancellor Gumban si Tumambing sang iya contact information para sa iya mga concerns.

‘Indi lang UP Visayas’

Ginkunfirmar naman ni Tumambing nga magluwas sa UP Visayas, plano niya man maghingyo sang kapareho nga impormasyon sa isa pa ka unibersidad sa Miagao nga Iloilo Science and Technology ukon ISATU-Miagao Campus.

Gin-una lang suno sa iya pangayuan ang UP Visayas bangud sang ila dako nga populasyon.

Ginkondenar sang All UP Academic Employees Union – Iloilo Chapter.
ang ila gintawag nga ‘pagprofile’ sa ila sang mga pulis.

Bukas naman si Tumambing sa pagpakig-dayalogo kay Chancellor Babaran agud makapa-athag sa tinutuyo sang ginaduso nga programa.