Senior Citizen nga babaye, nasapwan patay sa sulod sang iya balay sa Jaro
By: JoMaque | July 11, 2019, 8:50am
Via Aksyon Jorge Cabrera | Firingline
Jaro, Iloilo City — Yara na sa “advance state of decomposition” sang nasapwan ang babaye sa sulod sang balay sa M.H del Pilar, Jaro kagab-i.
Ginkilala ang napatay kay Aniceta Ong, 63 anyos nga residente sang nasambit nga lugar.
Suno kay Police Staff Sergeant Mary Lie Vencer sang Jaro Police Station, nasapwan ang bangkay nga nagapungko sa monoblock nga bangko sa ibabaw sang iya balay.
Ang iya pakaisa nga nagadul-ong sang pagkaon ang nakasapo sa bangkay.
Pila ka adlaw nga wala nakabisita ang iya pakaisa sa balay ni Ong bangud nagmasakit man siya.
Sabado sang aga suno kay Vencer, katapusan nga nakit-an sang iya mga kasilingan si Ong.
Naga-isahanon lang siya nga naga-istar sa iya balay.
Suno naman sa iya pakaisa, sang nagligad nga semana lang nakaguwa sa ospital si Ong bangud naliswahan sang ininit ang tiil pero antes sini, nabudlayan na nga maglakat ang babaye.
Nagapati ang pamilya nga wala sang foul play sa kamatayon ni Ong.