5 lakip ang ginpahayag nga nagatrabaho sa BFP, dakup sa drug buy bust operation sa Jaro

By: JoMaque | July 16, 2019, 8:30am
Via Aksyon Jorge Cabrera

Iloilo City – Lima ang dakup, lakip ang ginpahayag nga nagatrabaho sa Bureau of Fire Protection, sa drug buy bust operation sa Barangay Democracia, Jaro kahapon.

Naaresto ang subject nga si Garry Benidicto, 32, kag iya asawa nga si Malyn, 27.

Dakup man si Aileen Talero, 62, nga gintudlo sang team leader sang Regional Drug Enforcement Unit (RDEU) nga runner ni Benidicto.

Magluwas sa tatlo, gindakup man si Wilhelm Garcera, 44, kag iya utod nga si Wendell Garcera, 36 kag ginpahayag sang RDEU operative nga nagatrabaho sa Bureau of Fire Protection (BFP).

Suno sa RDEU team leader, si Wilhelm ang gin-transaksyon sang poseur-buyer gamit ang P7,000 buy bust money. Pero ginpahayag ni Wilhelm nga wala siya sang daku nga items gani gindala niya ang poseur-buyer kay Benidicto.

Nag-upod man si Wendell suno sa team leader bangud mag-abyan sila ni Benidicto.

26 ka sachets sang suspected shabu kag P7,000 buy bust money ang nakuha sa subject.

Wala nagasabat ang lima sang ginkuhaan sang pahayag sang Aksyon Radyo reporters.