By: JoMaque l July 17, 2019, 11:55am

Iloilo City–Nakabayad na ang Philippine Health Insurance Corp. (PhilHealth) 6 sang P81-million para sa mga pasyente nga may dengue sa Western Visayas halin Enero tubtob Hulyo 15, 2019.

Suno kay PhilHealth 6 Public Affairs Unit head Janimhe Jalbuna, kalabanan sa mga nabayaran sang PhilHealth ang para sa mga indigent kag sponsored-program members sang ahensiya nga naglab-ut sa P44-million.

Mas madamo man suno sa iya ang na-process nila para sa dengue patients subong nga tuig nga naglab-ut sa 1, 906, ikumparar sa 477 lang sang 2018.

Negros Occidental ang may pinakamataas nga nabayaran sang ahensiya kag nagasunod ang Iloilo.

P10,000 ang ginabayad sang PhilHealth sa ospital sa diin na-confine ang pasyente nga may dengue fever kag P16,000 naman para sa dengue severe.

Ginabasehan suno sa iya sa pagbayad ang final diagnosis sang doktor.

Kun may kumplikasyon naman ang pasyente, nagabayad ang PhilHealth sa mas malala nga kundisyon.

FROM PUBLIC TO PRIVATE HOSPITAL

Kun ang pasyente na-admit una sa pampubliko nga ospital kag ginsaylo sa pribado nga ospital, nagabayad ang PhilHealth sa facility sa diin nag-ayo ang pasyente.

Kinahanglan sang pasyente nga i-settle ang iya balayran sa government facility. Ang ikaduha nga facilidad suno kay Jalbuna ang may kinamatarong nga mag-claim sang refund.

SA MGA INDI PHILHEALTH MEMBERS

Kun ang pasyente indi miembro sang PhilHealth, may ginatawag suno kay Jalbuna nga Point of Service Program pero gina-implementar pa lang sa mga government hospitals.

Sa idalum sang programa, kun ma-assess nga pigado ang pasyente, mahimo siya ma-cover sang sponsored program kag malibre sa balayran.

Kun financially-capable naman ang pasyente kag indi miembro sang PhilHealth, puwede gihapon siya magpa-member kag mabayad lang sang 1-year premium contribution nga P2,000 para maka-avail sang benepisyo sang PhilHealth.

Sa mga indigent patients, mahimo ipa-check ang PhilHealth Portal sang ospital para ma-verify ang ila record kag indi na nila kinahanglan magkadto sa opisina sang ahensiya.

Nabutang suno kay Jalbuna sa portal kun entitled ukon eligible sila sa benepisyo.

Indi na kinahanglan ang barangay certification kun miembro sang indigent program sang PhilHealth.

Ang indigent program nasantu sa “Listahanan” sang Department of Social Welfare and Development (DSWD) sa diin nalista ang mga pigado.

Naga-provide man ini para sa “No Balance Billing” ukon “No Out-of-Pocket” expense sa pigado nga pasyente.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply