By: JoMaque | July 18, 2019, 8:45am

Iloilo City — Dapat gilayon na nga ma-activate ang Anti-Dengue Task Force sa 180 ka mga barangay sa siyudad sang Iloilo bangud sa pagdamo sang kaso sang dengue.

Ini ang ginahingyu ni Councilor Candice Tupas, author sang ordinansa nga nagamandu sa pagtukod sang task force batuk sa dengue sa mga kabaranggayan.

Suno kay Tupas, ginapaabot na niya nga magadamo ang kaso sang dengue subong nga 2019 bangud sa “three-year cycle sang dengue.”

Sang 2016, nagpasar man sang resolution ang City Council nga mag-conduct sang clean-up drive kada semana bilang pangontra sa dengue.

Pero gin-aku sang konsehal nga madamo gihapon nga mga residente ang wala nagapanglimpyo sang palibot kag base sa iya obserbasyon mga opisyal sang barangay, mga miembro sang 4P’s kag senior citizens lang ang naga-upod.

Ginpangabay man niya ang City Health Office nga ipasiguro nga bastante ang kemikal nga gamiton sa misting activity kag ipa-idalom sa paghanas ang mga miembro sang task force.

Ginpanugyanan ni Tupas ang mga residente nga magluwas sa pagpaninlo sa palibot, tutukan man ang sulod sang balay bangud may posibilidad nga nagapangitlog ang lamok nga may dengue sa idalom sang refrigerator, flower vase kag iban pa nga containers.

Base sa data sang CHO as of July 6, 2019, nagalab-ot na sa 716 dengue cases ang na record kag may pito ka napatay sa siyudad.

‘NO NEED’
Indi na kinahanglan ang Anti-Dengue Task Force suno kay Liga ng mga Barangay kag ex-officio Councilor Irene Ong.

Suno kay Ong, nagahulag man ang mga barangay officials agud matapna ang dengue kag may mga barangay nga ang mga tanod mismo ang nagapanglimpyo.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply