PRO-6, nagpanugyan sa kapulisan sa Western Visayas nga mangin alerto sa anuman nga opensiba nga posible ilunsar sang NPA

By: JoMaque | July 20, 2019, 11:50am

Iloilo City — Nagpanugyan ang Police Regional Office 6 sa kapulisan sa Western Visayas nga mangin alerto sa anuman nga opensiba nga posible ilunsar sang New People’s Army ukon NPA.

Kasunod ini sang nagluntad nga pagpang-ambush sang mga miembro sang NPA sa apat ka pulis sa Ayungon, Negros Oriental.

Gin-ako ni PRO 6 spokesperson Police Lt. Colonel Joem Malong nga masami gina-target sang NPA ang mga pulis gani mas maayo nga mag-doble-halong para makalikaw sa anuman nga insidente.

Ginapabugal sang PRO 6 ang maayo nga koordinasyon sang kapulisan kag militar sa rehiyon nga isa man sa mga preventive measures para indi maka-atake ang mga rebelde.

Nagapadayon man ang monitoring sang tanan nga intelligence units sang PRO 6 para matapna ang anuman nga ginaplano sang mga rebelde, indi lang sa ila nga mga pulis pati na sa bug-os nga Western Visayas.