Iloilo City — Napatay bangud sa dengue ang grade 1 pupil sang Rizal Elementary School nga ginkilala kay Julius Ocampo sang North Baluarte, Molo.

Suno sa iloy ni Julius nga si Anabel, July 15 (Lunes) sang hapon nagreklamo ang bata nga nagalain ang iya pamatyag rason nga ila ginpainum sang paracetamol.

Nagdumdom ang iloy nga nakibtan lang ang iya bata bangud nakadasma siya sang Dominggo, July 14.

Wala naman nadala ang bata sa ospital sang July 16 (Martes) bangud naga-ulan.

Nagtahaw suno sa iloy ang hilanat ni Julius sang July 17 (Miyerkules), pero nag-desisyon na siya nga dal-on ang bata sa ospital sang July 18 (Huwebes).

Ginpahayag sang iloy nga mapagsik pa ang iya nga bata sang nagpadulong sila sa ospital apang sang gin-check sang doctor, severe na suno sa iya ang dengue sang bata.

July 20 (Sabado) sang nagreklamo ang bata nga indi makaginhawa gani nagdesisyon sila nga ipa-ICU.

Ginpahayag sang iloy nga wala sang bakante sa ICU rason nga ginpabutangan na lang sang tubo ang bata pagka-Sabado sang gab-i.

Nag-bleeding ang bata suno kay Anabel sang ginbutangan sang tubo.

July 21 (Dominggo) mga las 11 sang aga napatay ang bata.

Nagapati ang iloy nga posible sa eskwelahan nakutot sang lamok nga may dengue si Julius bangud may isa pa gid ka estudyante halin sa eskwelahan nga naglain man ang pamatyag kadungan sang iya bata.

‘SIGE-SIGE ANG PAGPANGLIMPIYO’

Ginpa-athag naman sang School Clinic Teacher sang Rizal Elementary School nga si Ms. Maila Sumile nga sige-sige ang ila pagpanglimpiyo sa eskwelahan.

Adlaw-adlaw nga nagapaninlo ang mga ginikanan kag mga janitor suno sa iya.

Bisan ang mga barangay officials sang mga barangay sa palibot sang campus ang nagabulig man sa ila pagpanglimpyo.

Nagapang-spray man sila suno sa iya sang pesticide kontra lamok.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.