State of calamity, gindeklarar sa probinsya sang Iloilo kasunod sang dengue outbreak
By: Aine Grace Bravo | July 23, 2019,
Via Aksyon Mario Gelongo
Iloilo — Gin-aprubahan sang Sangguniang Panlalawigan ang deklarasyon sang state of calamity sa probinsya sang Iloilo kasunod sang dengue outbreak.
Suno kay BM Rolly Distura, gintalakay nila gilayon sa session sang SP subong nga hapon ang resolution sang Provincial Disaster Risk Reduction and Management Council (PDRRMC) nga pagdeklarar sang state of calamity matapos gin-endorso ni Governor Toto Defensor.
Ginbuhinan lang suno kay Distura ang pondo nga ginrekomendar sa resolution kag ginhimo na lang nga P26.5 million halin sa P28 million.
Nag-ugyon suno kay Distura ang tanan nga miembro sang SP sa pagdeklarar sang state of calamity agud ma-address na ang problema sa dengue sa probinsya.
Base sa record sang Hospital Managemetn Office (HMO), 998 ka pasyente nga may dengue ang na-admit sa 12 ka district hospitals sa probinsya alas-otso kaina sang aga.
Sa pinakaulihi naman nga record sang Provincial Health Office halin Enero 1 tubtob Hulyo 13, naglab-ot na sa 6,806 ang dengue cases nga may 23 ka patay sa probinsya sang Iloilo.