By: Aine Grace Bravo | July 24, 2019

via Aksyon Francis Basco

Barotac Nuevo, Iloilo — Patay ang 42-anyos nga lalaki sang gintiro sang riding-in-tandem sa Zamora corner Siaotung Street, Poblacion Ilawod, Barotac Nuevo las 7:3o kaina sang aga. 

Gindala pa sa Don Jose S. Monfort Medical Center si Conrado “Boy” Almarza III sang Brgy. Lagubang pero gindeklarar ni Dr. Liza Grace Alabado nga napatay las 8:29 sang aga.

May pilas sa likod ang biktima. 

Sa initial nga imbestigasyon ni PEMS Glen Portunes, deputy chief sang Barotac Nuevo Police Station, nagasakay sa motorsiklo si Almarza halin sa pagdul-ong sa iya bata sa Jalaud Elementary School sang ginsundan sang mga suspek nga nagasakay sa motorsiklo.

Suno naman kay alyas Manuel, yara siya sa sulod sang iya balay sang nabatian ang lupok sa pagpati nga may nagbunggu-anay lang nga motorsiklo. 

Nakita na lang ni Manuel nga natumba ang biktima sa karsada kag may pilas sa likod.

Nagapati naman si Mrs. Anabel Almarza, asawa sang biktima, nga konflikto sa duta ang motibo sa pagpatay sa iya bana. 

Base sa CCTV footage, makita ang mga suspek nga nagpalagyo sa direksyon sang simbahan sang Barotac Nuevo.

Wala sang suksok nga helmet kag tabon sa guya ang mga suspetsado suno kay Portunes. 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.