Masobra P5 million nga balor sang suspected shabu, nakumpiskar sa duha ka subject sang search warrant sa Negros Occidental

By: Aine Grace Bravo | July 25, 2019

via PDEA 6

Negros Occidental –Masobra P5 million nga balor sang suspected shabu ang nakumpiskar sang Philippine Drug Enforcement Agency (PDEA) 6 sa magkatuhay nga pagserbe sang search warrant sa Barangay Matab-ang, Talisay City, Negros Occidental kaina sang aga.

Suno kay PDEA 6 Director Alex Tablate, nadakpan ang subject sang isa ka search warrant nga si Markline Cuadra, 25 anyos.

Nakuha sa iya ang isa ka daku nga bulto kag 10 ka sachets sang suspected shabu nga nagabug-at sang 150 gramo kag may market value nga ginabanta P1.02 million.

Arestado man ang subject sang isa pa ka search warrant nga si Rhodora Hamantoc alyas Neneng Dadong, 57, upod kanday Eul Suanico, 33 sang Bacolod City; Ellan Vhone Escober, 19 sang Pntevedra, Negros Occidental kag Robert Discutido, 23 sang Bacolod City.

Nakuha naman sa balay ni Hamantoc ang anum ka packs kag 16 ka sachets sang suspected shabu nga nagabug-at sang 650 grams kag ginabanata nagabili sang P4.4 million.

Ginapreparar na ang kaso nga paglapas sa Comprehensive Dangerous Drugs Act batuk sa mga nadakpan.