Pamunuan sang WVMC, nagsabat sa reklamo nga ginbalibaran ang 3 pasyente nga gin-refer sang Maasin RHU

By: JoMaque | July 25, 2019, 9am
Via Aksyon Angel Mae Ciudad

Iloilo City — Wala ginbalibaran sang Western Visayas Medical Center (WVMC) ang mga pasyente nga may dengue nga gin-refer sang Rural Health Unit sang Maasin sang Martes.

Ini ang gin-athag ni Dr. Joseph Dean Nicolo, chief of hospital sang WVMC, kasunod sang reklamo ni Dr. Mae Albacete, Municipal Health Officer kag head sang RHU-Maasin.

Suno kay Dr. Nicolo, posible nga wala lang nag-intindihanay ang nurse sang RHU-Maasin nga nagtawag sa WVMC kag ang doctor nga nagsabat sa iya.

Ginapanindugan ni Nicolo nga nagapatuman sila sang ‘no refusal policy’ sa ospital.

Nagapahibalo lang suno sa iya ang ospital kon may referral nga puno sang pasyente kag kon handa nga maghulat tubtob nga magbakante.

Ginpanginwala man ni Nicolo nga may protocol ang ospital nga indi magbaton sang dengue patients kon indi magnubo sa 90 ang platelet.