PRO 6 Director Rene Pamuspusan, nagmandu sa mga pulis nga dakpon ang mga involved sa ‘bookies’ kun liwat nga mag-operate
By: JoMaque | Hulyo 30, 2019, 10:05am
Iloilo City — Ginmanduan ni Police Regional Office 6 Director Rene Pamuspusan ang mga provincial directors sa rehiyon nga dakpon ang mga may kaangtanan sa ‘bookies’ kun liwat nga magbalik sa illegal nga aktibidad.
Ini kasunod sang mandu ni Presidente Rodrigo Duterte nga pag-untat sa operations sang tanan nga mga betting games sa idalum sang Philippine Charity Sweepstakes Office ukon PCSO.
Suno kay Pamuspusan, ang mga Small Town Lottery ukon STL ang ginabasehan sang mga ‘bookies’ sang ila operation.
Ginapa-abot naman ni Pamuspusan nga magahimo sang bag-o nga scheme ang mga operators sang ‘bookies’ agud mapadayon ang ila operation.
Wala na sang ‘bookies’ sa probinsya
Ginkunfirmar naman ni Iloilo Police Provincial Office Director Marlon Tayaba nga wala na sang ‘bookies’ sa probinsya kasunod sang pag-untat man sang lihitimo nga operation sang STL sang Sabado, Hulyo 27.
Suno kay Tayaba, nagkalain lain ang mga operator sang ‘bookies’ sa kada distrito sa probinsya sadto apang indi nila masubject sa operation sadto bangud sa kakulang sang ebidensiya.
May nadakpan nga nagapataya sang ‘bookies’ apang wala naman nagasumiter sang sworn affidavit.
Naobserbahan naman suno kay Tayaba nga ang personnel sang lehitimo nga STL operator sa probinsya amo man ang nagapataya sang ‘bookies’.
‘May nagpataya sa gihapon’
Sa pihak sang mandu sang presidente, nagpataya sa gihapon ang 36-anyos nga babaye sa Barangay Ravina, Sibunag, Guimaras sang Hulyo 27.
Suno kay Police Captain Rico Sta. Ana, hepe sang Sibunag Police Station, nadakpan nila sa akto si Diane Marie Cuarte, pumuluyo sang Barangay San Miguel, Jordan, Guimaras, nga nagapataya.
Nakuhaan si Cuarte sang improvised cotejos kag P170 nga bet money.
Nagdepensa naman si Cuarte nga wala siya nakahibalo nga ginadumilian na ang pagpataya sa STL.
Lehitimo nga collector si Cuarte sa STL operator sa Guimaras.
Ginpasakaan sang kaso si Cuarte sa paglapas sa Republic Act 9287 (An Act Increasing The Penalties For illegal Numbers Games).