By: JoMaque | Agosto 3, 2019, 8:30am

Iloilo — Ginkunfirmar ni Iloilo Police Provincial Office Director PCOL Marlon Tayaba nga may iban pa nga drug group sa Iloilo, magluwas sa Bolivar Drug Group kag sa nabungkag na nga Odicta kag Prevendido Drug Groups.

Suno kay Tayaba, na-monitor nila sugod sang 2017 ang pag-operate sang Bandas Drug Group sa 5th Distirct.

Direkta nga nagakuha sang supply sang illegal nga druga sa Marawi kag Cotobato ang amo nga drug group nga may pito ka mga miembro suno kay Tayaba.

Antes na-monitor sang 2017, ginapanan-aw malawig na nga naga-operate ang Bandas Drug Group kag posible may kahigayunan man nga nakatransaksyon sila sadto sa Odicta kag Prevendido Drug Groups.

Wala ginhingadlan ni Tayaba ang leader sang amo nga drug group.

‘Gintokhang…nagpalagyo?’

Gin-subject sa tokhang ukon gintoktok sa ila panimalay kag ginhingyo nga mag-surrender ang mga miembro sang grupo suno kay Tayaba apang wala sila nag-surrender.

2018 sang gin-subject sila sa police operations paagi sa pagserbe sang search warrant apang wala na sila nakita sa ila lugar.

Suno kay Tayaba, may impormasyon nga nagkadto sa Lanao del Sur ang mga miembro sang Bandas Drug Group apang padayon ang ila monitoring bangud posible may kaangtanan gihapon sila sa illegal drug trade sa Quinto Distrito.

Sang damlag lang, may apat ka ginatudlo drug personalities nga gindakop sa Sara kag ang ila leader ang nagakuha sang supply sa miembro sang amo nga drug group suno kay Tayaba.

Una na ginpahayag ni Police Regional Office 6 Spokesperson PLTCOL Joem Malong nga 35 ka drug personalities ang miembro sang Bandas Drug Group kag lunsay sila gin-subject sa tokhang.

Suno kay Tayaba, pito lang ang miembro sang amo nga grupo base sa ila monitoring kag posible nalakip ni Malong sa pag-isip ang mga nagabakal sang illegal nga druga.

Base sa data halin sa PRO 6 nga gin-release sang Hulyo 29, naglab-ot na sa 2,911 ang mga drug personalities sa Western Visayas kag 111 sa ila ang na-monitor sa probinsya sang Iloilo.

‘Wala man sa Iloilo ang Bolivar Drug Group’

Ginkunfirmar man ni Tayaba nga wala na nila namonitor sa Iloilo ang mga miembro sang Bolivar Drug Group, sub group sadto sa Prevendido Drug Group nga ginapamunuan sang most wanted drug personality sa rehiyon nga si Ernesto Bolivar.

Suno sa PRO 6, kapin sa anum na lang ang nabilin nga miembro sang Bolivar Drug Group nga wala pa nadakpan sang mga pulis.

Nagapati naman si Tayaba nga may kaangtanan sa gihapon ang Bolivar Drug Group sa drug trade sa probinsya kag syudad.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply