DOT 6, nagatanyag sang ‘libre sakay’ sa mga pasahero halin sa Guimaras, turista man ukon indi

By: May Ortega l August 7, 2019
Via Aksyon Hotline

Iloilo City–Nagahatag sang libre sakay sa mga pasahero halin sa Guimaras ang Department of Tourism 6.

Kasunod ini sang trahedya sa Iloilo Strait sang Agosto 3 nga nagbilin sang 31 nga patay. Ang trahedya nagresulta sa pag-untat sang operation sang mga pumpboats kag pagka-stranded sang linibo ka mga pasahero sa Iloilo kag Guimaras.

Suno kay DOT 6 Director Helen Catalbas, mahimo magsakay sa vans sang ahensiya ang mga pasahero halin sa Guimaras nga nagadungka sa puerto sa Lapuz–turista man ukon indi.

I-transport ang mga pasahero sa ila tagsa ka destinasyon sa siyudad sang Iloilo kag pati na ang mga mapadulong sa Iloilo Airport.

Ginpahayag ni Catalbas nga wala sang distinction–mapa-turista man ukon indi– sa subong nga panahon bangud ang sitwasyon suno sa iya ang makabig nga “emergency.”

Tubtob may biyahe ang RoRo vessels halin Guimaras, magahatag sang serbisyo ang DOT 6 nga libre.

24 ang maakomodar sang duha ka vans nga naga-standby sa RoRo port sa Lapuz kag padugangan pa gid sang mas daku nga salakyan kun kinahanglanon suno kay Director Catalbas.

TRABAHO PARA SA PAMILYA NGA NAPATYAN

Sa mga napatyan, ginpahayag ni Catalbas nga magabulig man ang ahensiya para makapangita sang trabaho ang isa ka miembro sang kada pamilya.

Ginapa-inventory na ni Catalbas ang mga establishmento kun ano ang kinahanglanon nila nga skills agud dire mapasulod sa trabaho ang isa ka miembro sang pamilya nga napatyan.

Suno pa sa Director, nahangpan niya nga kadam-an sa 31 ka napatay sa trahedya ang mga breadwinners kabangdanan luyag gid sang ahensiya nga makabulig.