Mga taga-Guimaras, ginakulang sang sulud-anon matapos ginkanselar ang biyahe sang mga pumpboats kasunod sang trahedya sa Iloilo Strait–Gov. Gumarin

By: JoMaque l August 7, 2019

Guimaras, Iloilo–De la ta na lang ang ginasud-an subong sang kadam-an sa mga taga-Guimaras.

Suno kay Guimaras Governor Samuel Gumarin, halos wala na sila sang sud-an bangud sarado ang Buenavista kag Jordan wharves kag indi man masarangan sang roro vessel sang FF Cruz Shipping ang mga stranded nga pasahero.

Gin-untat ang biyahe sang mga pumpboats halin Iloilo kag Guimaras kag vice versa kasunod sang trahedya sang Sabado sa diin 28 ang patay sa pagkulob sang tatlo ka pumpboats.

Ginpahayag sang gobernador nga “unexpected” ukon wala gid nila ginpaabot ang natabu.

Suno kay Gumarin, concerned nila subong kun paano mahatagan sang financial kag moral support ang mga nalisdan.

Ginakabalak-an man suno sa iya sang provincial government ang mga estudyante, mga empleyado kag mga taga-iban nga probinsiya nga apat ka adlaw na nga stranded sa Guimaras.

Pila sa mga puwede options suno kay Gumarin ang pagpabiyahe sang dugang nga roro vessel ukon fastcraft sa Guimaras-Iloilo nga ruta.

Sa subong suno sa gobernador, ginapangabay nila ang mga malapit nga balay sa puerto nga buksan ang ila balay para sa personal necessities sang mga pasahero nga na-stranded.