Community quarantine ukon lockdown sa Metro Manila, gindeklarar ni Pres. Duterte kasunod sang pagpaidalum sa Code Red Sublevel 2 bangud sang COVID-19

By: JoMaque | Marso 13, 2020

Manila — Gindeklarar ni Presidente Rodrigo Duterte ang lockdown sang Metro Manila epektibu sa Marso 15, kasunod sang pagpataas sa highest COVID-alert level nga Code Red Sublevel 2 agud ma-contain ang paglapta sang virus.          

Suno kay Duterte, indi pagpasugtan ang masobra 12 ka milyon ka naga-istar sa Metro Manila nga magbiyahe paguwa sang National Capital Region paagi sa land, domestic air travel kag domestic sea travel tubtob sa Abril 14.

Magapadayon naman ang operasyon sang LRT, MRT kag Philippine National Railways, pero mapaguwa ang Department of Transportation sang guidelines agud masiguro ang social distancing sa mga tren.

Base sa community quarantine, dumilian ang mass gatherings kag siraduhan ang mga eskwelahan sa NCR tubtob sa Abril 12.

Ginabilin ni Duterte sa local government units ang pagsiguro nga nagapabilin lang sa ila balay ang mga estudyante samtang suspendido ang mga klase.

Suspendido man ang trabaho sa executive branch tubtob Abril 12, pero may skeletal workforce agud masiguro nga padayon ang pagserbisyo sa publiko.

Ginakumbinser sang presidente ang legislative kag judicial branches nga i-adoptar man ang pareho nga polisa.

Samtang magapadayon ang trabaho sa pribado nga sektor, pero ginlaygayan sang gobyerno ang mga employers nga magpatuman sang flexible work arrangements.

Ginpasalig nanday DILG Secretary Eduardo Año kag PNP Chief General Archie Gamboa nga nakahanda sila agud ipatuman ang mandu.