By: JoMaque | Marso 14, 2020

Leon – Padayon nga gina-monitor sa ospital ang duha ka tuig nga bata nga babaye nga gin-classify Patient Under Investigation sa COVID-19.

Ini ang ginkumpirmar ni Leon Mayor Ma. Lina Holipas.

Suno sa alkalde, may hilanat ang bata rason gilayon nga gindala sa ospital kahapon pagkatapos gin-assess sa Municipal Health Office.

Marso 7 sang nag-abot sa Pilipinas ang bata, upod ang iya 5-anyos nga magulang kag ila iloy halin sa Sri Lanka.

Sa data sang World Health Organization sang Marso 12, nalakip ang Sri Lanka sa mga pungsod nga may local transmission sang COVID-19.

Nadula na ang hilanat sang PUI. Gindala man sa ospital ang iya magulang kag ang ila iloy nga ginakabig naman nga Persons Under Monitoring.

Magluwas sa mag-iloy nga PUMs, may 17 pa ka mga PUMs sa Leon.

Kalabanan sa mga PUMs ang mga Overseas Filipino Workers kag halin sila sa Canada, Singapore, kag Hong Kong.

‘INDI MAG-PANIC’

Nagpanawagan naman si Mayor Holipas sa mga pumuluyo nga indi mag-panic.

Suno sa alkalde, importante ang kooperasyon sang mga pumuluyo para sa pag-monitor kag gilayon man nga aksyon.

Nagpanawagan man ang alkalde sa mga nagpauli nga OFWs nga magpahibalo sa ila mga barangay officials para ma-monitor.

Gina-monitor sang Barangay Health Emergency Response Team ang kondisyon sang mga nagpauli nga OFWs kag ginasumiter nila ini sa LGU kada adlaw.

Ang Leon, may 85 ka mga barangay.

‘PRECAUTIONARY MEASURES’

Bilang precautionary measure sa COVID-19 threat, nag-issue sang Executive Order si Mayor Holipas nga naga-suspend sa mass activities sa ila banwa.

Dugang diri, suspended man ang klase sa masunod nga semana.

Padayon nga nagahimo sang rekorida ang LGU para magpahibalo ang mga pumuluyo natuhoy sa COVID-19.

Sa data sang DOH6 ga gin-release subong nga adlaw, 45 ang mga PUIs sa rehiyon kag tatlo sa amo nga numero ang admitted sa ospital.

PUIs sa Aklan, Antique, kag Iloilo City ang mga admitted sa ospital.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply