Mga maabot sa Iloilo City halin sa Metro Manila, kabigon nga PUMs sa COVID-19 suno kay Mayor Jerry Treñas

By: Aine Grace Bravo | via Hotline

ILOILO CITY, March 14, 2020 — Pagakabigon na nga persons under monitoring (PUMs) sa coronavirus disease ukon COVID-19 ang tanan nga halin sa Metro Manila.

Ini ang ginpahibalo ni Iloilo City Mayor Jerry Treñas base sa bag-o nga decision tool nga ginpaguwa sang Department of Health (DOH).

Suno sa alkalde, dapat nga magpaidalum sa 14-day voluntary home quarantine ang mga PUMs.

Ginahingyo man ni Treñas ang mga barangay kapitan kag mga barangay health emergency response teams (BHERTs) nga i-monitor ang mga PUMs kag siguraduhon nga naka-voluntary quarantine agud indi na makalagaw kag indi makalaton pananglitan nga infected sila.

Kun makitaan naman sang sintomas ang PUM, igakonsiderar siya nga person under investigation kag gilayon nga pagadal-on sa ospital.

Ginsulit sang alkalde ang pahanumdom sa publiko nga maghalong kag mag-aligmat batok sa COVID-19.