Pagsulod kag tours sa Guimaras sang mga guests halin sa Metro Manila, iban pa nga lugar sa pungsod nga may localized transmission sang COVID-19, temporaryo nga ginsuspender
By: JoMaque | Marso 14, 2020
Guimaras — Nagpaguwa si Guimaras Gov. Samuel Gumarin sang Executive Order No. 32 Series of 2020 nga nagamandu sang temporaryo nga pagsuspender sa pagsulod ukon tours sa probinsya sang mga guests halin sa Metro Manila kag iban pa nga lugar sa pungsod nga may localized transmission sang COVID-19.
Maga-epekto gilayon ang EO nga ginpirmahan ni Gumarin subong nga adlaw.
Ginamanduan naman ang mga residente sang Guimaras nga halin sa Metro Manila kag iban pa nga areas nga may local COVID-transmission nga magpa-idalum sa mandatory self-quarantine sa sulod sang 20 ka adlaw sa idalum sang supervision sang rural health unit sa kada banwa.