Mga taga-Iloilo nga ara sa guwa sang probinsya, ginhatagan tubtob Marso 17 sang tungan gab-i nga magpauli antes ipatuman ang border restriction sa Marso 18

By: Aine Grace Bravo/Ariel Solacito | via Firingline

ILOILO, March 16, 2020 — Ginhatagan sang Iloilo Provincial Government ang mga Ilonggos sa guwa sang probinsya nga makapauli sa Iloilo sang tubtob na lang buwas, Marso 17 sang tungang gab-i.

Ini ang ginpahibalo ni Governor Arthur Defensor Jr., kasunod sang sinapol upod sa iban nga gobernador sa Panay kag Guimaras kaina.

Suno kay Defensor, wala na sang makasulod sa probinsya (bisan ang mga taga-Iloilo) sugod Marso 18, magluwas lang sa, (1) Mga government officials kag empleyado nga maga-perform sa ila katungdanan; (2) Medical personnel kag health workers/humanitarian workers nga may katungdanan may kaangtanan sa COVID-19 sa probinsya kag; (3) Ang mga residente sang Iloilo City nga nagapadulong sa probinsya sang Iloilo.

Gin-athag ni Defensor nga pasugtan man ang delivery sang goods agud magapadayon ang komersyo.

Sa pag-epekto sang border restriction, tubtob lang sa border ang mga depasahero nga salakyan. Pero indi apektado ang biyahe sang mga depasahero nga salakyan sa probinsya pakadto sa syudad sang Iloilo vice versa.

May checkpoint naman ang mga pulis nga ipatuman sa entry kag exit points sang Iloilo.

Ginpasugtan man ang mga taga-Guimaras nga makasulod sa Iloilo bangud sa siyudad sila nagapamalaklon. Pero, kinahanglan sang Guimaras suno kay Defensor nga magpatuman man sang restriction sa iban nga probinsiya lakip sa Negros Occidental.

Ang iban nga probinsiya ang magapatuman man sang restrictions agud malikawan ang pagsulod sang COVID-19 sa Panay kag Guimaras.

Magalawig ang border restriction sang Iloilo provincial government tubtob sa Abril 14.