By: Aine Grace Bravo | via Hotline

ILOILO, March 17, 2020 — Posible nga ipatuman ang community quarantine sa bilog nga isla sang Panay kun masiguro na nga hilway sa coronavirus disease ang kada probinsiya matapos ang ginpatuman nga mga border restrictions.

Suno kay Antique Governor Rhodora Cadiao, kun magtakop na ang border restrictions nga ginapatuman sang kada local government unit (LGU) sa Panay–Antique, Iloilo, Capiz kag Aklan–mahimo nga ipatuman ang Panay-wide community quarantine.

Mahimo na suno sa iya makapagusto libot ang mga tawo sa bisan diin nga probinsiya sa isla kun wala na sang border restrictions.

Pero sa subong, kinahanglan suno sa iya nga masiguro anay nga nagatenir sa ila balay ang mga tawo ilabe na ang mga persons under monitoring (PUMs) ukon ang mga bag-o lang nag-abot sa isla.

Isa ini sa naistoryahan sa sinapol sang mga gobernador sa Panay sang damlag lang.

Ginpahayag ni Cadiao nga handum sang tanan nga local chief executives sa Panay nga mangin COVID-19-free ang isla tubtob matapos ang pandemic.

Nagapangabay siya sa tanan nga magkooperar sa gobyerno agud indi makasulod sa isla ang virus.

Nagsugod na ang community quarantine kag border restriction sang Antique, Aklan, Capiz kag Iloilo.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.