Iloilo Governor Arthur Defensor Jr, nagsulit sang mga patakaran sa ginapatuman nga border restriction kag community quarantine sa probinsya

By: Aine Grace Bravo | via Balita Halin sa Kapitolyo

ILOILO, March 18, 2020 — Ginsulit ni Iloilo Gov. Arthur Defensor, Jr. ang kaundan sang Executive Order 28-C nga iya ginpaguwa may kaangtanan sa border restriction kag community quarantine sa probinsya nga ginapatuman agud mabatuan ang COVID-19.

Sa iya video message nga gin-post sa Facebook page sang Provincial Capitol, gin-isa-isa sang gobernador ang exemptions sa border restrictions.

Suno sa gobernador, ginadumilian ang mga tawo sa iban nga probinsya nga magsulod sa Iloilo magluwas lang sa mga masunod: Mga opisyal kag empleyado sang gobyerno nga nagabiyahe angut sa ila pagpangalagad; kag mga medical personnel kag health workers nga nagabiyahe angut sa ila katungdanan sa pagtapna sa pagduging sang COVID-19, kag mga humanitarian workers nga nagahatag bulig sa mga nagakinahanglan kag mga ginakulang.

Ang mga delivery trucks kag delivery vans naman nga may mga kargamento, pahanugutan nga magsulod sa Iloilo pero ginamanduan ang driver kag iya pahinante nga magpa-idalum sa quarantine procedure.