(UPDATE) Labing una nga COVID-19 patient sa Iloilo, estable na ang kondisyon –The Medical City CEO

By: Aine Grace Bravo | via Hotline

ILOILO CITY, March 23, 2020 — Estable na ang kondisyon sang labing una nga COVID-19 patient sa Iloilo.

Ini ang ginpahibalo ni Dr. Felix Ray Villa, CEO sang The Medical City-Iloilo sa diin na-admit ang 65 anyos nga anay seaman nga tumandok sang Guimbal.

Gin-athag ni Dr. Villa nga under close monitoring ang pasyente kag nagalaum nga maka-recover siya. Gin-isolate naman sa ospital suno kay Villa ang asawa sang pasyente nga ginakabig nga person under investigation.

Gin-admit sa ospital ang asawa samtang ginahulat ang resulta sang iya test.

Ang pasyente nagka-contact sa iya mga himata nga nagpauli halin sa abroad.

Magluwas sa mag-asawa, may duha pa ka persons under monitoring nga na-admit sa TMC nga nagahulat man sang resulta sang ila tests.

Gin-athag ni Dr. Villa nga indi himata sang mag-asawa ang duha ka PUMs pero may yara sang close contact sa ila.

Gintadlong naman ni Dr. Villa ang mga misconceptions sang publiko nga ginatago nila ang impormasyon sa ila COVID-19 patient.

Suno kay Villa, indi sila maka-announce kun wala sang kumpirmasyon halin sa Department of Health. Una suno sa iya ang official announcement sang DOH antes naman ang kumpirmasyon sang ospital.