Emergency Room sang Metro Iloilo Hospital and Medical Center nga nasudlan sang PUI, balik-operasyon na matapos ang ginhimo nga ‘terminal cleaning’

By: Khenjo Terco | Aksyon Radyo Iloilo

Iloilo City–Balik-operasyon na sugod las dyes kagab-i, Marso 23, ang main emergency room sang Metro Iloilo Hospital and Medical Center sa Metropolis Avenue sa Jaro.

Ginsiraduhan kahapon sang aga ang emergency room makaligad ini nasudlan sang lalaki nga ginkabig person under investigation matapos nakitaan sang mga sintomas sang coronavirus disease.

Ulihi na nagpahibalo ang lalaki nga nakabiyahe siya sa Manila kag nagpauli sa Iloilo sang Pebrero 29.

Suno kay Dr. Danilo Encarnacion, presidente kag CEO sang MIHMC, gilayon sila naghimo sang terminal cleaning matapos nag-ako ang lalaki nga halin siya sa Manila.

Las otso sang gab-i sang Marso 22 sang nag-abot ang lalaki sa ospital para ipa-check up ang iya bata nga may respiratory infection.

Sa triage pa lang sa diin una gina-interview ang mga luyag magpa-admit, makapila ka beses na ginpamangkot ang lalaki kun may yara siya sang travel history pero iya gin-deny.

Gindala sa isolation area sang emergency room ang mag-amay bangud nagabatyag sang hilanat kag ubo. Liwat ginpamangkot ang lalaki pero wala gihapon nag-ako.

Ginpasulod sa main emergency room ang mag-amay kag wala gihapon nag-ako sang ginpamangkot.

Sang ulihi, nakalab-ut sa admitting section ang mag-amay pero nagduda ang clerk bangud nagapalanglapsi kag naga-ubo ang tatay kabangdanan ginpamangkot liwat, ginpasikto kag ginpangabay nga magsugid sang insakto. Diri na kag nanugid ang lalaki nga nagbiyahe siya sa Manila.

Nanugid ang amay nga makaligad ang pila ka adlaw matapos siya nag-abot, ginhilanat kag gin-ubo ang iya bata kabangdanan gindala niya sa ospital.

Ginsaylo na suno kay Encarnacion sa government hospital ang mga pasyente.

Ginpahayag ni Encarnacion nga may protective gears ang ila mga doctors kag nurses nga naka-atubang sa mga pasyente.