By: Aine Grace Bravo | via Hotline

ILOILO CITY, March 25, 2020 — May mga qualifications sa mga pasyente nga ibutang sa Western Visayas Medical Center nga may 450-bed capacity bilang dedicated COVID-19 hospital.

Base ini sa ginpirmahan nga Memorandum of Agreement sa tunga sang mga private hospitals, WVMC, WVSUMC, Department of Health kag Iloilo City government kahapon.

Suno kay DOH 6 regional director Dr. Marlyn Convocar, ang mga qualifications sang mga pasyente amo ang may severe respiratory infection; comorbidity ukon simultaneous presence sang duha ka chronic diseases ukon kundisyon sa pasyente; tigulang kag positibo sa COVID-19.

Bakantehon naman ang WVMC sa mga non-COVID patients kag sayluhon sila sa iban nga ospital.

Ang mga persons under investigation (PUIs) nga indi elderly kag may mild tubtob moderate nga symptoms i-refer sa Western Visayas Sanitarium sa Sta. Barbara, Don Jose S. Monfort Western Visayas Medical Center Extension Hospital sa Barotac Nuevo kag Dr. Ricardo Y. Ladrido Memorial District Hospital sa Lambunao.

Ang iban nga probinsiya suno kay Convocar magapili man sang ila COVID hospital base sa resolution nga ginpasar sa meeting sang Inter-Agency Task Force kahapon.

Pero dapat dumdumon suno kay Convocar nga Level 2 hospitals lang ang sa iban nga probinsiya kabangdanan ang mga malala na gid nga kaso nga indi nila masarangan, i-refer sa WVMC.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.