By: Aine Grace Bravo/May Ortega |via Hotline

ILOILO, March 27, 2020 — Labaw sang sa peligro nga dala sang coronavirus disease 2019 ang panghangkat nga gina-atubang subong sang mga frontliners sa away kontra COVID-19.

Wala tuo ang reports sang mga insidente nga pag-discriminate sa mga nurses, doctors kag iban pa nga health workers—ginapalayuan, ginatabog sa ila gina-estaran samtang ang iban nagalakat lang pauli sa ila balay matapos ang malawig nga oras nga pag-atender sa mga pasyente sa ospital.

Sa panahon sang krisis nga dala sang COVID-19, nakatuon ang atensyon sang kalibutan sa mga frontliners bangud sila ang direkta nga naga-atubang sa mga natapikan sang virus.

Pero sa pihak sang ila pagserbisyo, ngaa diskriminasyon ang balos sa ila sang iban nga tawo?

NURSE NGA GINPAHALIN SA DORM

Matulog na kuntani ang nurse nga nagatrabaho sa isa ka ospital sa siyudad sang Iloilo sa ginadayunan niya nga dorm.

Pero nakibot siya sang nanuktok ang nagadumala kag ginhambalan siya kun puwede nga sa ospital lang anay kun diin siya naga-duty magtener kag i-refund lang ang iya ginbayad.

Naghilibi-un ang nurse sa sobra nga kalain sang buot kag imbes nga magpahuway, nagdali-dali siya pangita sang lugar nga mahimo niya sayluhan.

Ginpadayon ang nurse sa dorm sang ospital sa diin siya nagatrabaho.

Ginrason naman sang nagadumala nga luyag lamang niya maniguro nga indi siya matapikan sang virus lakip na ang iban pa nga mga boarders.

Mabudlay suno sa iya nga guwa-sulod sa dorm ang nurse bangud mabutang sa peligro ang ila kabuhi.

ANG ISTORYA NI ANDOY

Pauli na kuntani sa New Lucena halin sa siyudad sang Iloilo si Andoy upod ang iya asawa nga nagatrabaho sa ospital sang ginpadulog sila sang taga-Land Transportation Office.

Suno sa taga-LTO, gindakop si Andoy bangud sa pagpa-angkas sa iya asawa sa motorsiklo. Wala suno sa LTO personnel nag-practice sang social distancing ang mag-asawa.

Gin-issuehan sang temporary operators permit (TOP) si Andoy bangud sang reckless driving bisan pa ginpresentar na niya ang ID sang iya asawa, ID niya kag quarantine pass. Ginpresentar man sang mag-asawa ang vehicle pass nga ginhatag sang ospital.

Suno kay Andoy P3,000 ang iya multa.

Ginapaligban man subong ni Andoy kon paano niya makuha ang iya lisensya tungod wala man opisina ang LTO.

Ginreklamo ni Andoy nga wala man gindakop sang taga-LTO ang duha ka miembro sang Transportation Management and Traffic Regulation Office nga naga-angkasanay man sa motorsiklo.

Antes ang mga reklamo nga ini sang nurse kag ni Andoy nga ginpalab-ut sa Aksyon Radyo Iloilo, may mga reports na sang iban pa nga sahe sang diskriminasyon sa mga frontliners.

Halimbawa diri ang pagbawal sa mga personnel sang The Medical City nga magbakal sa tiyangge matapos nakumpirmar nga sa ila ospital gindala ang pasyente nga nagpositibo sa COVID-19.

Nakalab-ut man sa Aksyon Radyo ang natabu sa nurse nga ginpalayuan sang manugbaligya sang prutas.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.