2 barangays sa Barotac Nuevo, ginpaidalum sa heightened community quarantine umpisa Marso 28 tubtub Marso 30 bangud sang pinakauna nga kaso sang COVID-19 sa banwa

By: JoMaque | Marso 28, 2020

Iloilo — Ginpaidalum sa heightened community quarantine ang Barangay Ilaud Poblacion kag Brgy. Tabucan sa Barotac Nuevo umpisa subong, Marso 28 tubtub Marso 30.

Kasunod ini sang pinakauna nga kaso sang coronavirus disease (COVID-19) sa banwa.

Base sa ginpaguwa nga executive order ni Barotac Nuevo Mayor Bryant Paul Biron, indi makaguwa sa ila barangay ang mga residente kag hugton ang home quarantine sa kada pamalay.

Mga frontliners lang ang pasugtan nga makaguwa sa ila lugar.

May extreme disinfection man nga himuon sa barangay sugod subong nga adlaw tubtub Marso 30.

Pasiraduhan man ang merkado publiko sa amo nga petsa.

Magluwas diri, suspendido man ang tanan nga public transportation kag pasiraduhan ang tanan nga pribado nga establisemento.

Ginpasiguro sang alkalde nga may food assistance nga mabaton ang mga residente sa tatlo ka adlaw nga disinfection.