Guidelines sa EO nga naga-implementar sang Enhanced Community Quarantine sa probinsya sang Iloilo bangud sa COVID-19, ginpaguwa na ni Iloilo Gov. Arthur Defensor Jr.

By: JoMaque | Marso 28, 2020

Iloilo — Ginpaguwa ni Iloilo Governor Arthur Defensor, Jr. kahapon, Marso 27 ang guidelines sa iya Executive Order Number 80 nga naga-implementar sang Enhanced Community Quarantine bangud sa COVID-19.         

Naplastar sa memorandum para sa mga mayors kag punong barangay ang mga patakaran sa home quarantine, pagbiyahe sang mga salakyan kag pag-operate sang public markets.

Isa ka miembro sang pamilya lang ang idesignar nga hatagan sang ECQ Pass agud magbakal sang mga kinahanglan kag mag-atender sang health needs, pero pwede hatagan sang pass ang miembro sang pamilya nga nagatrabaho ukon naga-negosyo nga ginapasugtan sa EO.

Gina-obligar ang paghimo sang checkpoint sa exit sang barangay, ukon sa cluster sang mga barangays kag ipatuman ang “No Pass, NO Exit” nga polisa.

Dapat man mag-provide ang LGU sang shuttle services halin sa Barangay Exit Points pakadto sa Poblacion kag shuttle services para sa mga ECQ Pass holders nga naga-commute kada adlaw agud mag-trabaho sa Iloilo City, pero ipatuman gihapon ang social distancing.

Ginapasugtan naman ang pag-operate sang public markets kada adlaw, pero ginsuspender ang market day.

Gina-encourage man ni Defensor ang mga mayors nga i-cluster ang mga barangay kag i-skedyul kun ano nga adlaw ang pagpamalaklon sa merkado sang kada cluster agud malikawan ang paginutok.