Western Visayas, may 16 na ka COVID-19 cases

By: JoMaque | Marso 29, 2020

Iloilo — Nadugangan sang tatlo ka panibag-o nga kaso sang COVID-19 ang Western Visayas.

Ini ang ginkumpirmar ni Dr. Mary Jane Juanico, head sang Infectious Diseases Section sang Department of Health 6.

Base sa data sang DOH 6 kahapon sang hapon, Marso 28, ang PATIENT #14 amo ang 28-anyos nga lalaki nga taga-Bacolod City kag may travel history sa America.

PATIENT #15 ang 41-anyos nga babaye nga taga-Negros Occidental nga may travel history sa Manila kag Davao City.

Hypertensive kag asthmatic ang pasyente nga admitted pa sa ospital pero estable na ang kondisyon.

PATIENT #16 naman ang 70-anyos nga lalaki nga taga-Iloilo province. Wala sang travel history ang lalaki kag gina-verify pa ang iya exposure suno kay Juanico.

Admitted sa ospital ang pasyente kag ginapaidalum sa close monitoring.