By: Aine Grace Bravo | via Hotline

ILOILO CITY, March 30, 2020 — Handa na mag-akomodar ang training ship sang John B Lacson Foundation Maritime University sa Muelle Loney sa 100 frontliners sang Iloilo City Hall nga nagaresponde sa COVID-19 threat.

Suno kay Captain Jonathan Villaflor, kapitan sang barko, may walo ka mga kabina ang barko.

200 ka mga indibidwal ang ma-akomodar sa barko apang bangud sang social distance, ginpakamaayo nga katunga lang sang amo numero ang maka-avail.

May apat ka mga kabina sa main deck nga mahimo mag-akomodar sang 50 frontliners.

Amo man ang numero sang mahimo ma-akomodar nga mga frontliners sa lower deck.

Ang kada kabina ang may air condition kag mga cabinets.

May tag duha naman ka comfort kag shower rooms sa main deck kag lower deck.

Suno kay Captain Villaflor, mahimo man magamit sang mga frontliners ang mess hall (kalan-an) kag may gin-provide man sila nga water dispenser kag freezer.

Mahimo man makakadto ang mga frontliners sa sun deck agud magliwa-liwa.

Antes makasulod sa barko, i-check anay sang personnel sang city government ang mga natungdan.

Nag-angut ang MORE sang linya sang kuryente sa barko para sa mga frontliners.

Nag-provide naman sang water supply ang Metro Iloilo Water.

Ang city government ang maga-determine kun sin-o ang temporaryo nga matenir sa barko

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.