One Panay Community Quarantine, alang-alang pa suno sa mga opisyal
By: Aine Grace Bravo | via Hotline
ILOILO CITY, March 31, 2020 — Ginahulat pa ni Regional Disaster Risk Reduction and Management Council (RDRRMC)-6 chair Jose Roberto Nuñez ang sabat sang mga gobernador sa isla sang Panay sa proposal nga magpatuman sang “One Panay” community quarantine may kaangtanan sa coronavirus disease sugod kuntani sa Abril.
Sa idalum sang plano, buksan ang mga borders sang kada probinsiya sa Panay–Iloilo, Aklan, Antique kag Capiz. Malakip man sa plano ang probinsiya sang Guimaras
I-harmonize sang mga local chief executives sang mga probinsiya sa Panay, Guimaras pati na ang Iloilo City ang ila tagsa ka mga tikang agud maghimo sang isa ka executive order sa community quarantine.
Madumduman nga nagpanirado sang ila tagsa ka boundaries ang mga probinsiya santu man sa ginpatuman nga enhanced community quarantine agud mapunggan ang paglapta sang COVID-19.
Sa orihinal nga plano, buwas kuntani masugod ang One Panay sa diin hilway na nga makahulag kag makasaylo ang mga tawo sa Panay kag Guimaras.
ALANG-ALANG PA
Indi pa handa ang probinsiya sang Antique para buksan ang ila mga boundaries.
Suno kay Antique Governor Rhodora Cadiao, wala pa niya nalimpiyuhan ang iya probinsiya.
Luyag niya anay nga maniguro nga tinlo na ang probinsiya kabangdanan nga ginpalawig niya ang community quarantine tubtob sa Abril 14. Magatapos kuntani ini subong nga adlaw.
Nagpanirado sang border ang Antique matapos nagdagsa ang mga naghalin sa Manila sang ginpatuman ang enhanced community quarantine sa Luzon.
DEPENDE PA
Sa bahin naman sang Iloilo City, ginpahayag ni Mayor Jerry Treñas nga nakadepende pa sa matabu sa masunod nga duha ka semana ang proposal nga One Panay.
Si Treñas man ang nag-propose sadto sang plano.
Suno sa iya, magahimo pa sang COVID-19 tests sa siyudad kag magadepende sa resulta sini ang iya desisyon para sa One Panay proposal.
Sa karon suno sa alkalde, ang medical technologists sang siyudad ginahanas sang Department of Health para sa swabbing. Magalibot sila sa siyudad para magtipon sang mga samples.