By: Aine Grace Bravo | via Hotline

ILOILO CITY, April 1, 2020 — Wala gina-utay-utay sang Department of Health 6 ang resulta sang COVID-19 tests sa Western Visayas.

Pahayag ini ni Dr. Mary Jane Juanico, COVID-19 focal person sang DOH 6, sa tunga sang mga pahayag nga ginahawiran sang ahensiya ang pagpagguwa sang iban nga resulta agud malikawan ang pag-panic sang mga tawo.

Suno sa iya, kun pila ang nagpositibo nga resulta sa batch nga gin-test, ini man ang ginapagguwa sang DOH 6.

Kahapon sang aga, na-interview sang Aksyon Radyo Iloilo si Juanico pero wala niya nasugid nga may COVID-19 patient sa Guimbal nga napatay kahapon man sang kaagahon. Kahapon na sang hapon ginpagguwa sang DOH ang report nga nag-expire ang ikatatlo nga pasyente nga may COVID-19 sa amo nga banwa.

Paathag ni Juanico, nag-abot ang resulta sang test sang napatay nga pasyente kahapon sang udto kag kinahanglan pa nga aprubahan sang Research Institute for Tropical Medicine (RITM) antes ini ibalik sa DOH 6. Ang resulta ipahibalo naman sa provincial ukon city health offices nga amo naman ang magapahibalo sa Local Government Units kag sa ospital sa diin gin-admit ang pasyente.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.