Iloilo City Mayor Jerry Treñas, disappointed sa taga-DSWD bangud sa diyutay nga bulig ang ila ginahatag

By: JoMaque | April 1, 2020

Iloilo City — Indi mahangpan ni Iloilo City Mayor Jerry Treñas kun luyag gid man magbulig sang Department of Social Welfare and Development (DSWD) sa Iloilo City matapos ginpa-idalum sa enhanced community quarantine bangud sa krisis nga dala sang COVID-19.

Suno kay Treñas, 70,000 households ang ginatinguhaan sang siyudad nga mapakaun, pero 2,000 food packs lang ang ginpadala sang DSWD sang Lunes, Marso 30.

“I do not know if it’s a joke… or they really want to help… But you know gatan-aw ko sa telebisyon sa Manila… sa Metro Manila, tanan nga ginahatag to nga food packs, iya sang DSWD,” pahayag ni Treñas.

Indi na magpangabay sang bulig sa DSWD ang siyudad suno pa sa alkalde, kundi ma-demand na bangud ini ang katungdanan kag trabaho sang ahensiya.

Dapat kuntani suno sa alkalde nga paminsaron sang mga nagatrabaho sa national government agencies nga, “there are Filipinos outside Metro Manila.”

“ISSUE SA LISTAHAN SANG MGA BENEPISYARYO SA SOCIAL AMELIORATION PROGRAM SANG DSWD”

Nagpabutyag man si Treñas nga wala pa nakapalapit sa iya ang taga-DSWD agud ipatpat ang kaundan sang social amelioration program sang ahensiya.

Pero ginhatagan na ang LGUs sang deadline sa Abril 3 agud i-sumiter ang listahan sang mga residente nga pinaka-apektado sang mga quarantine bangud sa COVID-19.

Bisan wala pa gid napa-athag, ginpabutyag sang alkalde nga ila na ginatrabaho ang pagpanglista sa mga benepisyaryo sang programa.