Iloilo City Mayor Jerry Treñas, nag-demand sa DOH nga i-test ang tanan nga PUMs kag PUIs sa Iloilo City

By: JoMaque | April 1, 2020

ILOILO CITY, March 31, 2020 – Naga-demand na si Iloilo City Jerry Treñas sa Department of Health Region 6 nga mangin agresibo sa paghimo sang COVID-19 test sa tanan nga persons under monitoring (PUMs) kag persons under investigation (PUIs) sa syudad.

Ginpabutyag ni Treñas nga indi siya makahangup kun ngaa indi makahimo sang test ang DOH bisan pa may nag-abot na nga test kits.

Ginpahayag sang alkalde nga ginahimo niya ang demand, indi lang para sa syudad kundi para sa bilog nga Western Visayas bangud madamo na sang na-monitor nga PUMs kag PUIs.

Gintawag ni Treñas ang DOH nga indi transparent kag wala na naga-dayalugo sa LGU, “unless they need something.

Suno pa kay Treñas, ang DOH ang nagatago sang swabs nga ginagamit sa pag-test.

“ANG ATON MED TECHS, GIN-TRAIN NILA MAG-SWAB, PERO ANG SWABS SILA (DOH) GATAGO. TI KUN INDI SILA MAGHATAG SWAB SA ATON, ANO USARON SANG ATON MGA MED TECHS? ILA KAMOT ISUOK NILA SA MGA ILONG SANG MGA PASYENTE? DAW INDI NAMAN NA HUSTO ANG ILA GINA-OBRA,” suno sa alkalde.

“ON PPEs”

Responsibilidad sang DOH suno kay Mayor Treñas nga hatagan sang personal protective equipment (PPEs) ang mga frontliners sa medical field bangud sila ang nagatatap sa ikaayong lawas sang pumuluyo.

Pero ang nagakatabu, pareho sa syudad, ang mga Ilonggo pa ang nagahimo sang paagi agud nga mahatagan sang PPEs ang mga doktor, nurses kag iban pa nga frontliners sa mga ospital.

“I am very proud of the Ilonggos. Sila gapagita tela, sila gapatahi kag gina-make available sa mga ospital (ang PPEs),” pahayag ni Treñas.

Ginpahanumdom ni Treñas sa DOH nga “we are in a calamity because of the pandemic” gani dapat nga hulagon nila ang tanan nila nga resources. Kun kinahanglan ang testing, dapat himuon na ini gilayon suno sa alkalde, kag dapat man nga ulikdon sang DOH ang mga frontliners.