Iloilo Governor Arthur Defensor, Jr., nagpaguwa sang EO nga naga-restrict sa pagbiyahe sang mga residente sa mga lugar nga may local transmission sang COVID-19

By: Aine Grace Bravo | via Balita Halin sa Kapitolyo

ILOILO, April 2, 2020 — Nagpaguwa sang Executive Order Number 100 si Iloilo Governor Arthur Defensor, Jr. nga naga-restrict sang pagbiyahe halin kag pakadto sa mga banwa nga may kumpirmado nga local transmission sang COVID-19.

Maga-epekto ang mandu sang gobernador las-12:01 karon sa kaagahon. Suno kay Defensor, ginbase niya ang EO sa Resolution Number 11 sang Inter-Agency Task Force.

Suno sa Department of Health Western Visayas Center for Health Development 6, may local transmission sa Guimbal kag Lambunao.

Gin-athag ni Defensor nga maga-apply ang iya EO, indi lang sa duha ka banwa, kundi sa iban pa nga mga lugar nga mapamatud-an sa ulihi nga may local transmission sang virus.

Tuyo sang EO nga ma-limit ang paguwa sang mga tawo sa ila balay agud nga makalikaw sa balatian.