Mga mayors sa Quinto Distrito, nagpirma sang Joint Memorandum Circular agud himoon ang kada Domingo nga Total Quarantine Day

By: JoMaque | Abril 9, 2020

Iloilo — Nagpirma sang Joint Memorandum Circular ang Northern Iloilo Alliance (NIAD) Anti COVID 19 Task Force nga ginabug-usan sang 11 ka mayors sa Quinto Distrito sang Iloilo agud ipatuman ang total quarantine day kada Dominggo tubtob sa Abril 30, magluwas lang kun kinahanglan i-extend.

Nagakahulugan nga sirado sa Abril 12, Abril 19 kag Abril 26 ang tanan nga establisemento sa 11 ka banwa sa 5th District. Pasugtan lang nga magbukas ang mga pharmacies, clinics kag ang fish ports.

Ginalaygayan sang NIAD bisan ang may mga Enhanced Community Quarantine Pass nga magtenir lang sa balay KUN Dominggo.

Wala sang pasugtan nga makaguwa sa ila barangay, magluwas lang kun emerhensya.

Ginahingyo sang NIAD ang kooperasyon sang tanan agud mapanubo ang kaso sang COVID-19 sa probinsya kag masiguro nga indi makasulod sa Quinto Distrito ang virus.

Ang 5th District na lang ang wala sang positibo nga kaso sang COVID-19 sa Iloilo province gani gina-istrikto sang NIAD ang mga patakaran agud mamentinar nga COVID-19 free.