Labing una nga COVID-19 patient sa Panay nga taga-Guimbal, naka-recover na kag nakaguwa sa ospital subong – Guimbal Vice Mayor Jennifer Garin-Colada

By: JoMaque | Abril 13, 2020

Guimbal – Naka-recover na kag nakaguwa sa ospital kahapon, Abril 12, ang labing una nga COVID-19 patient sa Panay nga tumandok sang Guimbal.

Ini ang ginkumpirmar ni Guimbal Vice Mayor Jennifer Garin-Colada sa blocktime program sa Aksyon Radyo Iloilo nga Tribuna sang Banwa.

Suno kay Colada, ginpahibalo sa iya ang amo nga impormasyon sang Municipal Health Officer sa Guimbal nga si Dr. Jay Dorin.

Ang labing una nga COVID-19 patient sa Panay nga tumandok sang Guimbal amo si WV2, 65-anyos nga lalaki.

Wala sang travel history si WV2 apang may himata siya nga nagbyahe sa Japan.

Si WV18, 51-anyos nga babaye halin man sa Guimbal, ang kabulig nanday WV2.

Wala sang sintomas si WV18 rason naga-home quarantine.

Sa advisory sang Department of Health as of April 11 nila nga data, anum na ka mga COVID-19 patients sa rehiyon ang naka-recover.

Duha ang naka-recover sa Bacolod City kag tag-isa sa Capiz, Negros Occidental, Iloilo City, kag probinsya sang Iloilo.

Ang naka-recover sa Bacolod City amo kanday WV1 kag WV9; si WV3 naman sa Iloilo City.

Si WV15 ang naga-isahanon nga COVID-19 patient sa Negros Occidental samtang ginkumpirmar naman sang Capiz Provincial Office nga naka-recover naman si WV4.