DSWD 6, nag-ako nga may pagsalangisag sa tunga nila sang LGUs natuhoy sa target beneficiaries sa Social Amelioration Program

By: JoMaque | Abril 14, 2020

Iloilo — May pagsalangisag sa tunga sang Department of Social Welfare and Development (DSWD 6) kag mga Local Government Units (LGUs) sa Iloilo may kaangtanan sa target beneficiaries sa Social Amelioration Program.

Gin-ako ni DSWD Assistant Secretary Rhea Peñaflor nga wala nila naklaro sa mga LGUs nga lakip na sa mga target beneficiaries ang mga 4Ps members.

Suno kay Peñaflor, automatic nga malakip ang mga 4Ps sa ginhatag nga target beneficiaries sa kada LGUs.

I-validate naman sang DSWD ang mga beneficiaries nga nagsobra sa listahan kag nagapamiligro nga indi madala sa kada LGU.

Kon ma-validate, isumiter nila sa central office ang listahan. Ang central office naman ang masumiter sa Department of Finance (DOF) agud mapangitaan sang pundo.

Indi makapromisa ang DSWD nga makabaton ang mga nagsobra sa listahan, pero nagpasalig suno sa iya ang executive branch nga pangitaan ini sang pundo agud mabuligan.

Ginkumpirmar man ni Peñaflor nga naka-transfer na sila sang pundo sa 58 LGUs sa rehiyon. Sige-sige suno sa iya ang pag-transfer tubtob maubos nga mahatagan ang mga LGUs.

Ginalauman nga masugod na sa pagpay-out ang mga LGUs sa Miyerkules, Abril 15, tubtob sa masunod nga semana.

Sa Rehiyon 6, nagalab-ut sa 1,472,683 ka mga beneficiaries sang SAP lakip ang 318,899 ka mga 4Ps members.