By: Aine Grace Bravo | via Alsjohn Torreta

MANILA, April 14, 2020 — Ginarespeto ni Overseas Workers Welfare Administration (OWWA) administrator Hans Leo Cacdac ang desisyon sang mga local officials sa Iloilosa indi gilayon pagbaton sang mga Overseas Filipino Workers nga na-stranded bangud sang enhanced community quarantine sa Manila.

Sa exclusive interview sang Aksyon Radyo Iloilo kay Cacdac, ginpahayag niya nga magapadayon ang ila opisina sa pag-akomodar sang mga OFWs nga na-stranded sa iban nga mga lugar ukon rehiyon.

Ipalab-ot naman ni Cacdac ang concern sang Iloilo officials sa Inter Agency Task Force.

Sigurado nga padayunon ang pagbyahe sa mga stranded OFWs papauli sa ila lugar kun bukas sa pagbaton ang ila Local Government Unit.

Sandig sa IATF Resolution Number 18 suno kay Cacdac, ginapanugyanan ang mga LGUs nga pahanugutan ang pagbyahe papauli sa ila lugar sang mga stranded OFWs pagkatapos sang ila 14-day quarantine period.

Sa IATF Resolution Number 22 naman, dapat pahanugutan sang mga LGUs ang pagdungka sa pwerto sang maritime vessels nga may karga nga mga OFWs nga may certification nga nakatapos na sila sa ila 14-day quarantine.

Una na ginpahayag ni Iloilo City Mayor Jerry Treñas nga indi siya magbaton sa mga stranded OFWs kun wala sila sang clearance nga na-test antes pa man sila ginbyahe pabalik sa syudad.

Nagdesisyon naman si Iloilo Governor Arthur Defensor, Jr. nga indi pagdayunon subong nga adlaw ang pagpauli sang 100 OFWs halin sa Luzon samtang gina-finalize pa ang pasilidad nga pagadal-an sa ila.

Sang Abril 9, 47 ka mga pasahero ang ginbyahe halin sa Cebu City pakadto sa Iloilo City bisan may travel restrictions.

Nagpositibo sa COVID-19 ang seafarer nga lakip sa mga pasahero.

Suno kay Dr. Ma. Sophia Pulmones, chief sang Local Health Support Division sa Department of Health 6, pag-abot sa Iloilo sang mga gin-transport nga mga OFWs, kinahanglan sila magpaidalum sa 14-day facility-based quarantine para masigurado nga wala sila sang virus.

Ang LGU ang maga-dedicate sang pasilidad, samtang ang mga health officials ang maga-monitor sa mga OFWs suno sa DOH 6.

Ginabanta 3,000 OFWs ang gina-akomodar sang OWWA sa Metro Manila.

Mahimo naman mag-contact sa OWWA ang iban pa nga mga OFWs nga nakatapos na sang ila 14-day quarantine agud maproseso man ang pagbyahe papauli sa ila lugar.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.