Antique Governor Cadiao, nagkumpirmar nga ginapa-eksplikar siya sang DILG 6 angut sa gin-issue niya nga EO 40

By: JoMaque | Abril 17, 2020

Iloilo City — Ginkumpirmar ni Antique Governor Rhodora Cadiao nga ginpa-eksplikar siya sang Department of Interior and Local Government 6 natuhoy sa Executive Order 40 nga gin-issue niya sa pag-implementar sa Modified Enhanced Community Quarantine.

Suno kay Cadiao, ginhatagan siya sang 48 oras para magpaathag sa pagdumili sa pagdala sang ‘essential goods’ sa Pandan kag Semirara Island sa Caluya sa diin na-record ang duha ka kumpirmado nga kaso sang COVID-19.

Ginpabutyag ni Cadiao nga indi dapat pagi-literal ang nasaad sa iya EO bangud wala sang gobernador nga luyag magutman ang mga pumuluyo sa ila lugar.

Dugang niya, ginmanduan man niya ang mga alkalde nga mahimo sila mag-implementar sang mga polisa sa ila banwa.

Gin-issue ni Cadiao ang EO 40 kahapon apang gin-amyendaran niya ini subong nga adlaw pagkatapos nangin sentro sang kritisismo.

Lakip man sa gin-amend ni Cadiao ang oras sa pag-deliver sang mga gamit para sa DPWH projects.

Halin sa 7:00 A.M. tubtob 3:00 P.M., ginhimo niya ini nga 7:00 A.M. tubtob 5:00 P.M. base man sa desisyon sang Inter Agency Task Force Antique.