Dormitoryo sang JBLFMU- Arevalo Campus, preparado na para himuon nga quarantine facility sang gin-repatriate nga mga OFWs
By: JoMaque | Abril 16, 2020
Iloilo City – Preparado na ang duha ka dormitoryo sang John B. Lacson Foundation Maritime University (JBLFMU) – Arevalo Campus nga himuon nga quarantine facility sang mga gin-repatriate nga mga overseas Filipino workers (OFWs) nga mapauli sa Iloilo.
Ini ang ginpasalig ni Captain Luis Evidente, executive assistant sang CEO sang JBLFMU, matapos nga gin-inspect sang Office of the Civil Defense (OCD) 6 kag Oversease Welfare Worker Administration (OWWA).
Suno kay Evidente, ginbaton nila ang pagpanghangkat bangud kalabanan sa mga gin-repatriate nga mga OFWs ang ila mga alumni.
Prayoridad suno sa iya ang alumni sang JBLFMU nga makagamit sa quarantine facility.
Masobra 100 ang ma-akomodar sang dormitoryo, pero buhinan ini bangud sa ipatuman nga social distancing. Ang OCD 6 kag OWWA ang madesisyon kon pila ang patineron sa dormitoryo.
Ang gobyerno suno kay Evidente ang masabat sa kinahanglanon sang mga repatriates kag facilidad lang ang ipahulam sang unibersidad.