Iloilo City Mayor Jerry Treñas, liwat ginhingyo ang kooperasyon sang tanan agud malab-ut ang target nga amat-amat mabuksan ang mga negosyo sa Mayo 1
By: JoMaque | Abril 16, 2020
ILOILO CITY – Handa na ang City Government nga ipatuman ang “block off” sa Abril 18, 19, 25 kag 26 bilang kabahin sang mga pagtinguha agud indi maglapta ang COVID-19.
Suno kay Mayor Jerry Treñas, ginpirmahan niya ang Executive Order No. 063-A s. of 2020 nga naga-amendar sang Expanded Enhanced Community Quarantine sa weekend tubtob Abril 30.
Pasugtan na nga mag-operate ang mga supermarkets, sari-sari stores, groceries kag convenience stores, pero halin lang las-nueve sa aga tubtob las-tres sa hapon. Dapat man nga may quarantine pass kag nakasuksok sang face mask ang customer.
Ginapangabay ni Mayor Treñas ang kooperasyon sang tanan bangud target niya nga maka-amat-amat na bukas ang mga negosyo sa Mayo 1, 2020.
Suno sa alkalde, matukod siya sang task force upod sa mga negosyante agud matun-an kun paano ma-implementar ang pagbalik sang operasyon sang mga negosyo.
Target sang syudad nga maka-operate na ang mga negosyo agud may trabaho naman ang mga pumuluyo.
Pero malab-ut lang ini nga target suno sa alkalde kun indi magpasaway ang mga pumuluyo, magtenir lang sa balay kun wala man lang sang emerhensya kag mag-practice sang physical distancing kag proper hygiene.