By: JoMaque | Abril 16, 2020

Iloilo City — Nagpatindog sang relief operation center sa Jaro kag Molo ang PISTON Panay agud makatipon sang donasyon para sa ila mga drivers nga nadulaan sang palangabuhian kasunod sang ginpatuman nga enhanced community quarantine sa siyudad sang Iloilo bangud sang COVID-19.

Ini ang napinsaran kag ginkasugtan sang mga drivers suno kay PISTON Panay President Edgar Salarda.

Nagplastar ang grupo sang tolda sa higad sang karsada agud maghingyo sang donasyon sa mga nagalabay para i-soporta sa ila mga drivers. Isa ini sa napinsaran nga paagi sang grupo suno kay Salarda bangud wala na sila sang makuhaan sang ila pang adlaw-adlaw nga kinahanglanon halin sang ginpauntat sila sa pagbiyahe.

Apang ginkakibot sang grupo sang ginpahalin sila sang mga pulis sa ila pwesto sa Jaro kahapon. Suno Salarda, ginmanduan ni Police Regional Office 6 diretcor Rene Pamuspusan ang kapulisan nga pahalinon sila.

Dugangpa niya, wala man sila sang iligal nga ginahimo kag ginasunod man nila ang precuationary measures batuk sa COVID-19 nga ginapatuman sang gobyerno pareho sang pagsuksok sang face mask kag pag-obserbar sang physical distancing. May mga quarantine pass man ang kada miyembro sang grupo nga nagakadto sa ila operation center.

Nagapanawagan ang PISTON Panay kay PRO6 director Pamuspusan nga pasugtan sila sa ila ginahimo bangud mangin mabudlay pa gid ang ila kahimtangan kun pahalinon sina.
Wala napat-od sang grupo kun tubtob san-o matapos ang enhanced community quarantine kag nasiguro ni Salarda nga indi magpahimunong sa ila panimalay ang mga tawo kun makabatyag na sila sang gutom.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply