Mga barangay tanod, barangay health workers kag barangay day care workers, pwede malakip nga benepisaryo sang SAP –DSWD Asec Peñaflor

By: JoMaque | Abril 17, 2020

Iloilo City — Ginbaton sang Department of Social Welfare and Development ang apelasyon sang Department of Interior and Local Government nga ilakip sa benepisaryo sang Social Amelioration Program ang mga barangay tanod, barangay health workers kag barangay day care workers.

Suno kay DSWD Assistant Secretary Rhea Peñaflor, nabaton sang DSWD ang sulat ni DILG Undersecretary Jonathan Malaya may kaangtanan sa concern.

Posible suno kay Peñaflor nga makapaguwa ang DSWD sang guidelines anuman nga oras.

Pero iya gin-athag nga pwede na malakip nga benepisaryo ang mga tanod, BHW kag Day Care Workers sang barangay kun wala na sila sang source of income magluwas sa ila trabaho ukon nalakip sila sa mga low income earners.

“PWEDE MAKA-APELAR”
Mahimo naman maka-apelar suno kay Asec Peñaflor ang mga pamilya nga wala malakip sa listahan sang SAP beneficiaries kun sa ila pamatyag, qualified sila.

Ginpanugyanan ni Peñaflor ang luyag mag-apelar nga magpalista sa Municipal Social Welfare and Development Office ukon City Social Welfare and Development Office. Ang MSWDO ukon CSWDO ang masumiter sa field office sang DSWD agud ma-validate kag mapasa ang mga pangalan sa ila central office.

“PAANO ANG MGA INDI KWALIPIKADO PERO NALAKIP SA LISTAHAN?”
Ginpa-athag ni Peñaflor nga maathag sa guidelines nga kun may malakip sa benepisaryo nga indi kwalipikado, ipa-refund sa local government unit ang ma-release nga pondo. Mahimo suno kay Peñaflor nga mapasakaan man sang kaso ang mayor kun may makalusot nga indi qualified sa programa.

P6,000 ang mabaton sang kada benepisaryo subong nga Abril kag dugang nga P6,000 sa Mayo.

Subong nga adlaw, nakabaton na sang amelioration para sa Abril ang mga benepisaryo sa Zarraga kag Passi City sa Iloilo kag Belison kag Libertad sa Antique.